- 26/04/2023
- 52
- нет
Республика күнүн көрсө сыллата ыытыллар «Дабай» интеллектуальнай оонньуу библиотека тэрийиитинэн ыытылынна.
Сылаҥҥа сэргэх тэрээһин дьону түмэн ыытылынна. «Дабай» өй-билии, тургутук оонньуу сыллата ыытыллар. Быйыл 6 хамаанда араас тэрилтэлэртэн, түмсүүлэртэн кэлэн кыттан, оонньоон бардылар.
«Алаһа» ветераннар түмсүүлэрин хамаандата, сыл аайы кыттан, кыайан, иннилэрин биэрэ иликтэр. Бу да сырыыга 5 түһүмэхтээх оонньууга кыайыыны ситиһэн кинигэ бэлэх уонна көһө сылдьар кубогы ылан бардылар.
«Харысхал» Сылаҥнааҕы В.М.Макаров аатынан участковай балыыһа хамаандата үөрэ-көтө кэлэн, кыттан, иккис миэстэни ылан бардылар. Махтал!
Саамай туруу үлэһит дьоммут, тыа сирин тутаах дьоно — бааһынай хаһаайыстыбалар түмсүүлэрин хамаандата «Быйаҥ» бу күн быйаҥнаах буоллулар. Үһүс бочуоттаах миэстини ылан, кинигэ бэлэх тутан астыннылар. Эһиил эмиэ көрсүөхпүт!
Ыраах сытар Улхан Күөл «Тобул» хамаандата быйыл кыайыыга кыратык тиийбэтилэр, ол гынан санааларын түһэрбэттэр, аныгыс оонньууга кэлиэхпит, кыайыахпыт дэстилэр. Былырыын иккис миэстэ буолбуттара. Бу курдук тыҥааһыннаах оонньуу интириэһи тарда, дьону түмэ турдун!
«Сулусчаан» Сылаҥнааҕы оҕо сайдар киинин «Чөмчүүк» хамаандата көхтөөхтүк кэлэн, кыттан үөрдүлэр. Эрдэтээҥи оонньууларга иккис-үһүс буолар хамаанда, эһиилгигэ киирсиэхпит дэстилэр.
Бары кыттыбыт хамаандаларга, кэлэн ыалдьыбыт көрөөччүлэргэ, барҕа махтал!
Оонньуу биэс түһүмэхтээх :
1 түһүмэх — Үс хардыы — үс эппиэт
2 түһүмэх — Тылы таай!
3 түһүмэх — Кинигэ аатын ситэр, манна Сылаҥ дьоһун дьонун туһунан кинигэлэр ааттарын ситэрэн биэриэхтээх этилэр
4 түһүмэх — Ураты бэлиэлэр — манна Чурапчы нэһилиэктэрин гербэлэрин таайаллар.
5 түһүмэх — сэргэх оонньуу — тылы таайтарыы.
Комментарий читателей статьи "Республика күнүн көрсө сыллата ыытыллар «Дабай» интеллектуальнай оонньуу библиотека тэрийиитинэн ыытылынна."