МБУ "Чурапчинская МЦБС"
филиал №12 сыланская сельская
модельная библиотека

Алтынньы 20 күнүгэр Сылаҥнааҕы А.А.Сивцев аатынан сынньалаҥ киин тэрээһининэн Саха республикатыгар Ийэ, Аан дойдуга кыыс оҕо күнүн көрсө «Кэрэ куолас» диэн ааттаан Ийэ уонна кыыс дуэтынан ырыаларыгар конкурс буолла. Конкурска үс ыал кытынна : 4 оҕо ийэтэ Саманта Алексеевна уонна Милана Беляевалар, 4 оҕо ийэтэ Сардана Николаевна уонна Олеся Игнатьевалар уонна 6 оҕо ийэтэ Надежда Филипповна уонна Иоханна Коркиналар. Ону таһынан сонун эҕэрдэ номердар кэлбит дьону сэргэхситтилэр : кыра кылаас оҕолоро аныгы хамсаныынан флеш-моб үҥкүүлээн көрдөрдүлэр, оскуола ыытыллыбыт «Голос. Дети» конкурс кыайыылаахтара 5 кылаас оҕолоро «Спасибо» ырыалара, 9 кылаас үөрэнээччитэ Миша Слепцов «Ийэбэр» ырыата, Түөйэ оскуолатын үөрэнээччитэ Никита Новгородов ырыалара кэлбит ийэлэри эҕэрдэлээтилэр. А.А.Сивцев аат сынньалаҥ киин үлэһиттэрэ толорбут ырыалара эмиэ сонун буолла. Конкурсу үс киһилээх дьүүллүүр сүбэ сыаналаата : СӨ култууратын туйгуна, СӨ норуотун маастара Агафья Николаевна Никитина, сынньалаҥ киин директора Собакин Алексей Семенович уонна сынньалаҥ киин методиһа Ольга Дмитриевна Макарова. Ырыа дьоро киэһэтин олус табыллан иилээн-саҕалаан ыытта Лена Иосифовна Сивцева. Аҕыйах кыттааччы диэбэккэ наһаа үчүгэй концеры көрөн, ырыаһыттары сэргээн үөрэн-астынан тарҕастыбыт. Кыыс оҕо ыллыыр баҕатын толорон ийэлэр тэҥҥэ үөрэ-көтө сыанаҕа тахсыбыттара олус кэрэ уонна хайҕаллаах. Бу курдук куруутун бэйэ-бэйэни өйөнсө, харыстыы уонна истиҥ сыһаҥҥытын илдьэ сылдьыҥ диэн баҕаран, бары үчүгэйи этэн сахалыы алҕыы хааллыбыт.