МБУ "Чурапчинская МЦБС"
филиал №12 сыланская сельская
модельная библиотека

Убаастыыр, күндү коллегабыт, култуура эйгэтигэр 40 ча сыл бэриниилэхтик үлэлээн кэлбит, СӨ култууратын туйгуна, Трофимова Любовь Петровна  туһунан сырдатан ааһыахпын баҕардым. Сылаҥнааҕы сынньалаҥ киин Улахан Күөл учаастагар уус-уран салайааччынан ситиһиилээхтик үлэлээн, дьон-сэргэ махталын, олохтоохтор ытыктабылларын ылар. Любовь Петровна дьону түмэр дьоҕурдаах, араас сонун идеялардаах, олус түргэн туттулаах, куруутун барыны бары оҥоро, тэрийэ сылдьар.  Кэргэнэ, эмиэ култуура үлэтигэр олоҕун анаабыт Федор Павлович Трофимов СӨ култууратын туйгуна, култуура ветерана, мелодист, ырыаһыт бастыҥа. Бу икки култуура эйгэтин сөбүлээн, ол тула олорон, үлэлээн, сатабылларын, билиилэрин-көрүүлэрин, талааннарын-дьоҕурдарын барытын дьоҥҥо анаабыт үтүө ыал, үлэһит дьон, култуура специалистара буолаллар. Трофимовтар дьиэ кэргэн тулалыыр дьонноругар, тапталлаах Улахан Күөллэригэр олус элбэҕи биэрэн, айан-тутан, кэрэ бырааһынньыктары тэрийэн, дьону түмэн, үөрдэн-көтүтэн, элбэххэ үөрэтэн-уһуйан кэллилэр. Сылаҥҥа ыытыллар улахан дьаһаллары тэрийсэн, дьону түмэн киллэрэн кытыннаран, сүүрэн-көтөн көмөлөһөн, бары үлэҕэ тэҥҥэ ылсыһан сылдьаллара. Улууска араас хабааннаах тэрээһиннэргэ нэһилиэк аатын чиэстээхтик көмүскээн, долгуйа, үөрэ кыттарыттан биһиги олус үөрэбит уонна киниэхэ куруутун эрэллээхпит. Любовь Петровна эйэҕэс майгылаах, наһаа үөрүнньэҥ уонна барытыгар дьоҕурдаах. Бастыҥ хаһаайка — сибэккитэ, оҕуруота, дьиэтэ-уота, тэлгэһэтэ куруутун кэрэ көстүүлээхтэр. Асчыт үтүөтэ – Любовь Петровна сылаас чэйэ, торта, аһын арааһа,  кэнсиэрбэтэ олус минньигэс, элбэхтэ ыалдьыттаан, маанылатан ааспыппыт.

   Любовь Петровна, Федор Павлович кинигэ ааҕаллар, биирдэрэ нууччалыы, биирдэрэ сахалыы. Сылаҥҥа киирдэҕинэ куруутун библиотеканы тумнубат, кинигэ уларсан барар, таарыйа дьонугар эмиэ кыбынан тахсар.

  Куруутун үөрэ-көтө, элбэх кэпсээннээх кэлэр буолаар, Любовь Петровна! Үбүлүөйдээх кэрэ-бэлиэ күҥҥүнэн бары коллегаларыҥ, А.А.Сивцев аатынан Сылаҥ сынньалаҥ киин үлэһиттэрин ааттарыттан итиитик-истиҥник эҕэрдэлиибит! Эн эдэр үлэһиттэргэ сүбэҥ-амаҥ, көмөҥ иһин махтанабыт! Баҕарабыт, үтүө күннэри, чэгиэн доруобуйаны, үгүс үөрүүнү, уһун дьоллоох олоҕу! Федор Павловичтыын иллээх дьиэ кэргэн олоххут оҕолоргут, кырачаан сиэҥҥит, чугас аймах-билэ дьоҥҥут тапталынан угуттанан өссө да киэркэйэ турдун! Олох бары кэрэтин аныыбыт, күндү дьоммутугар, убаастыыр коллегаларбытыгар!