МБУ "Чурапчинская МЦБС"
филиал №12 сыланская сельская
модельная библиотека

Республикаҕа биллэр талааннаах баянист, ырыаһыт, аккомпаниотар Спиридон Гаврильевич Готовцев  сырдык аатыгар муус устар 11 күнүгэр Чурапчыҕа  “Айылгы” култуура киинигэр республика баянистарын түмэн ахтыы тэрээһин, ырыа алыптаах эйгэтин баянынан  доҕуһуоллатан истиҥник буолан ааста.

  Күнүс 3 чаастан ыалдьыттары киириитэ кытта сахалы сиэринэн сылаас чэйинэн, арыылаах алаадьынан күндүлүү көрүстүлэр А.А.Сивцев аат.Сылаҥнааҕы  сынньалаҥ киин кэрэ кыргыттара. “Олоҕун ырыанан киэргэппит баянист доҕорбут” – остуол тула олорон Спиридон Гаврильевич туһанан ахтыылар, кэпсэтиилэр буоллулар. Манна кыттыыны ыллылар Тааттаттан, Уус-Алдантан, Мэҥэ Хаҥаластан, Дьокуускай куораттан баянистар Болтоҥо, Сылаҥ дьоно-сэргэтэ, Спиридон Гаврильевиһы кытта алтыспыт, атастыы-доҕордуу буолбут дьон, аймахтара. Кэпсэтиини иилэн-саҕалаан ыыттылар Чурапчы улууһун олоҥхоҕо уонна фольклорга салаатын салайааччыта, уһун сылларга Чурапчы улууһун култууратын салайбыт Дмитрий Дмитриевич Попов уонна Чурапчы улууһун баянистарын түмсүүтүн салайааччыта Руслан Федорович Гоголев. Көрсүһүү Руслан Гоголев тылларыгар уонна матыыбыгар Спиридон Гаврильевичка анаммыт саҥа ырыанан аһылынна. Икки чаастаах кэпсэтии, ахтыылар Спиридон Гаврильевиһы баянист быһыытынан, доҕор, коллега, аккомпаниатор бастыҥа, истиҥ кэргэн, аҕа, тапталлаах эһээ буолан бу олоххо дьоллоохтук олорон барбытын ахтан-санаан, махтанан аастылар. Көрсүһүүбүт Владимир Колтовскай “Таптаа” ырыатынан, автор бэйэтэ толоруутунан, баян тыаһынан түмүктэннэ.

  Киэһэ 7 чаастан  “Айылгыбыт” зала тобус толору көрөөччүнэн туолан, бары долгуйа сцена аһыллыытын кэтэһэн олордубут. “Баяным эйээр, дууһаны долгутан” кэнсиэр саҕаланыаҕыттан бүтүөр дылы дохсун ытыс тыаһа доҕуһуолланан, олус истиҥ эйгэни тэрийэн хас биирдии кыттааччы, хас биирдии көрөөччү астына дуоһуйа бу кэнсиэри түмүктээтилэр. Кэнсиэри иилээн-саҕалаан ыытта СӨ култууратын үтүөлээх үлэһитэ, Чурапчылар бары ытыктыыр киһибит Надежда Михайловна Заболоцкая. Кыттыыны ыллылар : Дьокуускайтан Алексей Павлов салайааччылаах баянистар, ураты кэрэ куоластаах Константин Иванов,  мелодист Владимир Колтовской, Уус-Алдантан Петров Василий Николевич салайааччылаах баянистар, ырыаһыттар, түөрт геройдаах Байаҕантан нэһилиэгин “Дьиэрэй” народнай ансамбла,сал, Неустроев Михаил Михайлович, Александр Иванович Павлов салайааччылаах Ытык Таатта баянистара, ырыаһыттара, Мэҥэ Хаҥаластан Юристан Николаевич Михайлов уонна Спиридон Гаврильевич бииргэ үөрэммит доҕотторо Маргарита Еремеевна, Василий Николаевич Даниловтар, Чурапчыттан ветераннар хордара, Гаврил Макаров, Петр Макаров, Сылаҥ ырыаһыт уолаттара, Альбина Макарова баян доҕуһуолунан саха таптыыр ырыаларын дьиэрэтэн көрөөччүгэ бэлэхтээтилэр. Биир ураты, кэрэ көстүүнэн Спиридон Гаврильевич оҕолоро Евгений уонна Валентина Готовцевтар ырыалара залы сэргэхситтэ. Бу кэнсиэргэ ыллаабыт, кыттыбыт бары ырыаһыттарга, ытыктабыллаах баянистарбытыгар Сылаҥ дьонун-сэргэтин, А.А.Сивцев аат. сынньалаҥ киин коллективын аатыттан барҕа махталбытын этэбит. Баян тыаһы дьону ыҥыра-угуйа турдун, ырыа тула көрөөччү муста турдун, баянынан ырыа тэнийдин, сайыннын.

   Кэнсиэр түмүктэммитин кэннэ истиҥ тыллары анаан махтал суруктары кэлбит ыалдьыттарга, тэрийээччилэргэ анаан туттардылар Чурапчы улууһун  дьаһалтатын аатытттан Мария Филипповна Кронникова, Чурапчы сэлиэнньэтин баһылыга Владимир Дмитриевич Сивцев, култуура управлениятын аатыттан Дмитрий Дмитриевич Попов, Сылаҥ нэһилиэгин баһылыга Егор Иннокентьевич Макаров.

  Үтүө санааттан, тапталтан тахсыбыт бу тэрээһини тэрийбит Спиридон Гаврильевич тапталлаах кэргэнигэр Марфа Дмитриевнаҕа, оҕолоругар махтанабыт уонна өссө да ырыанан олоххутун  киэргэтэ, уһуннук дьоллоохтук олоруҥ, диэн баҕа санаабытын тиэрдэбит.

Анастасия Аммосова.