МБУ "Чурапчинская МЦБС"
филиал №12 сыланская сельская
модельная библиотека

“Күн сирин көрдөрбүт, киһи буолар олохпутун түстээбит күндү төрөппүттэрбитигэр муҥура суох махталбыт бэлиэтэ” – диэн киирии тылынан саҕаламмыт кинигэ дириҥ ис хоһоонноох, биир аймах тус эйгэтин арыйар истиҥ тыллардаах, түөрт көлүөнэ олоҕун кэпсээнэ, олоххо сыһыана – күндү киһи Ийэ тула мунньуллубут.

Аннотациятыттан : Бу кинигэ күндү төрөппүттэрбитигэр Аянитов Алексей Афанасьевичка, Герой Ийэ Иванова Мария Павловнаҕа муҥура суох махталбыт туоһута буолар. Кинилэр олорон ааспыт олохторун туһунан кинилэри өйдүүр-саныыр дьоннорун, аймахтарбыт, оҕолорун, сиэннэрин ахтыыларыттан, хаартыскалартан таҥыллан оҥоһуллунна. Ийэбит бэйэтэ суруйан хаалларбыт ахтыыларын, магнитофоҥҥа уһуллубут кэпсээнин холбоон киллэрдибит. Кэбээйи улууһун Лүүчүн, Чурапчы улууһун Арыылаах нэһилиэктэригэр олоро сылдьыбыт өбүгэлэрбит тустарынан кэнчээри ыччакка анаан сырдаттыбыт.

Кинигэ туһунан билиһиннэриини киирэн билсиэххитин сөп.

«Үйэлээх махтал» кинигэ презентацията сүрдээх истиҥ эйгэҕэ буолан ааста. Ахтыылар бу кинигэ улахан суолтатын арыйдылар, кэлэр көлүөнэ ыччакка, оҕолорго туһата тахса туруо диэн эрэллээхтэрин эттилэр. Елена Алексеевна бу кинигэ суруллуутун, сыалын-соругун кэпсээтэ, төрөппүттэрэ оҕолорун айылҕаны кытта ыкса сибээстээхтик ииппиттэрин туһаайан эттэ. Алексей Алексеевич ийэтин, аҕатын истиҥник ахтан кэпсээтэ, олоххо бэлэмнээх гына ииппиттэр, олус элбэххэ үөрэппиттэр диэн тоһоҕолоон бэлиэтээтэ. Нэһилиэк ытык кырдьаҕаһа Борис Пахомович Аянитовтар ыаллар олохторо билиҥҥи ыччат ыал дьоҥҥо үтүө холобур буолар, диэн кэпсээнин бигэргэттэ. Бу курдук, ахтыы оҥорбут дьон кэпсээннэрэ, эппит тыллара олус дириҥ ис хоһоонноох кинигэ тахсыбытын бэлиэтээн Аянитовтар аймахха улахан махтал тылларын эттилэр.