МБУ "Чурапчинская МЦБС"
филиал №12 сыланская сельская
модельная библиотека

Алтынньы 22 күнүгэр норуоттан тахсыбыт дэгиттэр талааннаах, барыга дьоҕурдаах, эргиччи сайдыылаах, мындыр өйдөөх Чурапчы улууһун Сылаҥ нэһилиэгит Бэрэтиттэн төрүттээх Иннокентий Иванович Сивцев-Мытыйыкы төрөөбүтэ 155 сылын туолла.
155 сыл анараа өттүгэр Боотуруускай улуус Сылаҥ нэһилиэгэр дьадаҥы дьиэ кэргэҥҥэ Лөгөнтөй диэн ааттаммыт уол оҕо күн сирин көрбүтэ. Кыра эрдэҕиттэн билиигэ дьоҕурдаах уол түбэһиэх дьонтон ааҕа-суруйа үөрэммитэ. Сылаҥ таҥаратын дьиэтин оҥоро Иркутскайтан кэлбит архитектор, худуоһунньук Моравскай Владимир Никандровичка баҕа өттүнэн илии-атах үлэһит, көмөлөһөөччү буолбута. Дьэ, мантан саҕаламмыта ойуулуур-дьүһүннүүр идэҕэ умсугуйуута. 1897 с. Лөгөтөй Сиипсэп Дьокуускай епискобыттан таҥара дьиэтин роспистарын оҥорорго көҥүл ылбыта.
Мытыйыкы мас, көмүс, тимир ууһа, муосчут, дуйдьут, иистэнньэҥ. Кини ордук ойууһут (иконописец), мас ууһун быһыытынан биллибитэ.Бахсы, Бүтэйдээх, Сыҥаһалаах, Чычымах, Күндүл, Чурапчы таҥараларын дьиэлэрин иконостастарын, роспистарын оҥорбута биллэр. Иннокентий Иванович Сивцев-Мытыйыкы ойуулуур-дьүһүннүүр искусствоҕа саҥа кэрдииһин чугас доҕоро, сахалартан бастакы врач П.Н.Сокольников көрдөһүүтүнэн улуу суруйааччы Лев Толстой мэтириэтини оҥоруута буолбута.
1921 с. уон улуус дьадаҥыларын Чурапчыга буолбут конференциятыгар анаан саха уруһуйдьуттарыттан аан бастаан В.И.Ленин мэтириэтин оҥорбута биллэр. Үгүс үлэлэрэ ааттара эрэ биллэр, сураҕа суох сүтэн-иҥэн хаалбыттар.
Ол да буоллар төһө харыллан хаалбытынан, тутуулара баалларынан, иконолара туралларынан, араас мас оҥоһуктара, уруһуйдара музейдарга, ыалларга баалларынан уонна дьон-сэргэ кэпсээнинэн Иннокентий Иванович Сивцев-Мытыйыкы диэн үтүө киһи, сүдү талаан олорон ааспытын бүгүҥҥү ыччакка кэпсиир, тириэрдэр соруктаах үлэбитин салгыыбыт.
Куруутун баар буолуохтара Мытыйыкы сыдьааннара – худуоһунньуктар, уустар, иистэнньэҥнэр, тутаачылар, айааччылар!