МБУ "Чурапчинская МЦБС"
филиал №12 сыланская сельская
модельная библиотека

Никитина Любовь Федотовна –Тапталаана, Чурапчы улууһугар Мындаҕаайы бөһүөлэгэр төрөөбүтэ. Оҕо сааһа, оскуолатааҕы сыла Уһун-Күөл бөһүөлэгэр ааспыта. Оскуола, интернат коллективыгар үлэлээн, олоҕун аргыһын көрсөн, биэс оҕону төрөтөн, дьиэлэнэн олохсуйан эдэр сааһа Сылаҥ бөһүөлэгэр ааспыта. Билигин бочуоттаах сынньалаҥҥа олорор. 2019-2020 сс. кыралаан бэйэтигэр эрэ суруйар буолбут. 2021 с. бастакы кинигэтэ, “Хоһооннорум-холууптарым, мин көтөр кынаттарым” бэчээттэнэн тахсан, онтон кынат анньынан суруйарга санаммыт. Оҕолорго аналлаах “Кустук оонньуур ыллыктара” диэн кинигэ бэчээттэнэн күн сирин көрбүтэ. 2022 с. “Уран тыл оһуора” литературнай түмсүүгэ киирбитэ. “Иэйиилээх толоонум дьэдьэнин амсатан”, “Сибэкким нарынын тулабар ыһабын” диэн хоһоон хомуурунньуктара бэчээттэммиттэрэ. Кыра саастаах оҕолорго анаан “Күнү олус таптыыбын”, “Оҕо саас” хомуурунньуктар күн сирин көрбүттэрэ. “Ымыылаах хоһоонум ыллыктарынан” хоһоон кинигэтэ 2025 с. бэчээттэммитэ. Үлэ, сыана бэтэрээн. Элбэх оҕо ийэтэ, сиэн эбээтэ.

Любовь Федотовна, дорообо! Сылаҥнааҕы тыа сирин модельнай библиотекатын сайтыгар “Библиотека ыалдьыта” диэн рубрикабар ыалдьыттыырга сөбүлэспиккэр махтал! Аҕыйах ыйытыкка эппиттээн сонуннуҥ аһан ааһаргар көрдөһөбүн.

1. Айар үлэҕэ хайдах кэлбиккиний? Бастаан кыралаан 2019 сылтан бэйэм-бэйэбэр тугу саныырбын, тулабар тугу көрөрбүн, хоһуйан суруйар этим. 2020 сылтан саҕаламмыта буолуо, бастаан сэҥээрэн ааҕар буолтум кэннэ. Суруйуохпун сини эбит дии санаммытым. Оҕолорго аналлаах хоһооннортон саҕалаабытым суруйуубун.
2. Үксүн туох туһунан суруйаҕын? Айылҕа, таптал туһунан.
3. Кинигэҕэ ааҕыыга сыһыаныҥ. Кырдьыгынан эттэххэ урут ааҕар этим кэпсээннэри, остуоруйалар, оҕолорбор ааҕар буоларым. Билигин күн-дьыл наһаа түргэн, бэйэм бытааран буолуо дуу? Быыспар сүүрэ сылдьан киирэн эклбит иэйиилэрбин тиһэбин.
4. Билиҥҥи кэм оҕолоругар, эдэр төрөппүттэргэ тугу этиэҥ этэй, баҕа санаа курдук. Билигин оҕолор наһаа телефоҥҥа, компьютерга, интернеккэ убаннылар. Сахалыы тылбыт сүтэр куттала буолаары гынна. Өбүгэбитүгэстэрэ, төрүт дьарыктара, култуурабыт сүппэтэр ханнык, куоракка саха оскуолата, саха кылаастара сорох оскуолаларга син баар буолан эрэр кыралаан. Оҕолору үлэнэн иитиээхэ наада дии саныыбын. Тыа оҕолоро быдан түргэннэр, эрчимнээхтэр, үлэҕэ олоххо быдан бэлэмнээх курдуктар. Дьоннорну кытта тэҥҥэ оттоон-мастаан, ханна баҕарар бэйэлэрин көрүнэн, булан-талан сылдьаллар дии саныыбын.
5. Саамай баҕарар баҕа санааҥ. Эйэлээх күөх халлааны! Экологиябытн харыстыаҕыҥ! Хасс биирдии киһи сирэйигэр тапталы, үөрүүнү, мичээри, дьолу баҕарабын! Оҕолорбутугар, сиэннэрбитигэр, дьоллоох оҕо сааһы! Сахабыт тыла, өбүгэбит үгэһэ, эппит кэриэс тыллара хаһан да умнуллубатын!

   Любовь Федотовна, улахан махтал! Айар үлэҕэр өссө да үгүс кэрэ кэпсээннэри, дириҥ ис хоһоонноох, үтүө санаалаах иэйиилээх хоһооннор айылла-сурулла туралларыгар баҕарабын. Дьиэ кэргэҥҥэр, оҕолоргор, сиэннэргэр, чугас дьоҥҥор дьоллоох олоҕу, үгүс үөрүүнү, ситиһиилээх күннэри.

Убаастабыллаах Сылаҥ нэһилиэгин дьоно-сэргэтэ, ыалдьыттара! Олунньу 28 күнүгэр, киэһэ 5 чаастан Сылаҥнааҕы А.А.Сивцев аат.НАДЬ «Куйаартан кутуллар дьүрүскэн» байаанынан ырыа дьоро киэһэтигэр ыҥырабыт. Бу күн Любовь Никитина-Тапталаана хоһоонноругар ырыалар байаан алыптаах дорҕоонунан көрөөччүгэ тиийиэхтэрэ. Ырыа кэрэ түгэнин мүччү тутумаҥ! Барыгытын күүтэбит!